Pormal nang pumasok sa Pinoy Pop (P-Pop) scene ang panibagong co-ed group na VITA PH, na naglalayong magdala ng bagong enerhiya, iba’t ibang talento, at mensahe ng pagkakaisa sa lokal na industriya ng musika.
‘Different Hearts, One Heartbeat’
Dala ang motto na “Different hearts, one heartbeat,” ang pangalang VITA PH ay kumakatawan sa apat na pangunahing haligi: Various, In one, Together, at Always.
Nangangako ang apat na miyembro na magpapakita ng iba’t ibang mukha ng buhay sa entablado sa pamamagitan ng pagsasama ng husay sa boses, pagsasayaw, magandang biswal, at pagtatanghal na mula sa puso.
Kilalanin ang mga Miyembro
Binubuo ang VITA PH ng apat na talentadong miyembro na may kanya-kanyang gampanin sa grupo. Pinangungunahan ito ni Eys bilang leader, main dancer, at main rapper. Kasama rin sa grupo si Ayah na nagsisilbing main vocalist at visual, si Nadia bilang lead dancer at center, at si Jeiu bilang lead vocalist.
Orihinal na Musika at Fandom na ‘VITALS’
Ibinahagi ng lider ng grupo na si Eys na nakatutok ang VITA PH sa pagpapakilala ng mga orihinal na kanta para sa kanilang mga tagasuporta, at may mga plano nang maglabas ng musika sa lalong madaling panahon.
Pormal ding ipinakilala ang kanilang opisyal na fandom na tatawaging “VITALS,” na kumakatawan sa mahalagang ugnayan sa pagitan ng grupo at ng kaniyang mga tagapakinig. Inilalabas ang mga pinakabagong update ukol sa kanilang pre-debut activities at music releases sa mga opisyal na social media platforms ng VITA PH sa Facebook, Instagram, at TikTok.